Ladder Jeschichte
Der Dom von Immeroat.
Krööchte on Älempt häbbe joa bös 1975 beij der Krais Ärkelänts jehüert. En de Schuel häbbe vörr noch jeliert, dat dä Krais Ärkelänts di „Gestalt eines sitzenden Hundes“ haar. Och di enkele Jemändes von der Krais mooche vörr uutwändich liere. Dat veel onger „Heimatkunde“.
Vörr Joare es jo all von de Rejierong beschloate woarde, dat e jonts Deel von dä alde Krais Ärkelänts wächjebaggert sall weärde, weäje dat de RWE Braunkoal ut de Eärd hoale wull, vörr Schtroom de maake. Et bejoav sech en dä Tiit, vörr schreefe et Joar 1987, Ministerpräsidänt en Düsseldoref woar Johannes Rau, Minister vörr Ömmwält on de Buere woar Matthiesen (dä Norddütsche möt dä Baart), Willy Stein woar Börjemeester von Ärkelänts. Du koam Matthiesen möt di frohe Botschaft na Ärkelänts dat 8900 Mönsche en 17 Ortschafte ömmjesiidelt-, 350 Buerehöäf, 7 Kereke , 8 Kapälle, 580 Betriibe möt 1500 Ärbetsplääts wächjebaggert weärde salle.
De Autobaan on Schtroate wüerte ömmjelooch, Brögge aafjebroake on noije jebauwt. Dat wüer dat Projäkt Jartswailer 2. Doduer wüerte 15000 Ärbetsplääts jesiekert. Ävver natüerlik wüer dat alles noch net sieker. Et es sieker och maar tsuvällich, dat Wolfjang Clement, dä 1998 Ministerpräsidänt jewoarde es, 1992 en der Aufsichtsrat von de RWE koam. Örr könnt mech jlööve, dat dat alles schtämmt. Ech häbb mech di Artikele ut et Archiiv von de Schtatt Ärkelänts besorecht.
Ännije Döreper send och jerümmt on ömmjesiidelt woarde, so z.B. Borschemich. Riisije Löäker waarte jebaggert.. Nou sall Immeroat an de Raij sien. Dat schtong nou jruet en de Tsaitong. Der Dom von Immeroat ( St. Lambertus) dä 123 Joar aat es, es der 13. Oktober 2013 „entwidmet“ woarde on sall dann aafjebroake weärde.
Wail os jo möt dä Krais Ärkelänts emmer von vrööjer heär noch jätt verböngt, hätt der Haimatverain kort on bündich en Radtour aanjesotte on vörr kreeche och äne Vortraach von der Kerekevorschtand taujesooch. Möt 25 Raadvaarer meeke vörr os an der 28. Säptämber 2013 op Weäch. Tien Lüü, dänne dat Raadvaare de hääl woar, send noch möt et Auto noa jekomme. Man süüt, dat sech noch vüel Lüü dovüer enträsseere.
Di Kerek von Immeroat waard all emmer äs „der Dom“ beteekent, weäje dat hä twie huere Tuere hätt, di man all von witts sien konn. Wänn man övver di Autobaan 61 na Heem koam on soach di Kerektuere von Immeroat, dann woos man, dat et net mier wiit bös de Heem woar. Et woar e Woarteeken vörr di jontse Jeäjend. Dat alles sall nou plott jemäkkt weärde vörr „Braunkohle“ de jewönne, di man en et Ausland vüel bällijer jälle konn on di och waal, weäje dat seij de düer es, övverhaupt net mier jebrukkt wörrd.
Wi vörr nou en Immeroat aankoame, waarte vörr jonts schtäll. Vörr koame os vüer wi en e Jaisterdorep. De meeste Hüüser woare all net mier bewont. En der Oart leävete noch 100 Lüü, di ävver och en korte Tiit uutträkke mödde. Et Kronkehuus, de Schuel, alles lägt leäch. Änne Siekerheetsdänns pääst op, dat net all de Schiive kapott jeschmiete weärde on di Hüüser net uutjeroovt on en Bronk jeschteäke weärde.
Wi vertällt wörrd, konn man beij de RWE äne Schiin kriije, dann dörev man Denge ut verloate Hüüser uutbauwe joan.
Wi vörr nou en de Kerek koame on soare, wi jood di noch enoader es, leepe de meeste kaa Schuuvere övver der Röök, wänn em dodraan dooch, dat di en e paar Weäke fleech plott jemäkkt wörrd. Wänn em dann hüert, dat maar e paar Saakes von de Kerek mötjenoame weärde döreve, di dann et Jemändetsäntrum en „Neuimmerath“ enjebrooch weärde, dat ävver övver di schuene Kerekevenstere on Kerekebänk de RWE de sägge hätt, välls dou von der Jloov aaf. Wänn em dat süüt, konn känne Mönsch bejriipe, dat sojätt von Lüü möt Verschtonk beschloate woarde es.
De RWE on de Politiker wälle os wiismaake, dat dur dä Aafbauw jottweetnetwivüel Ärbetsplääts jewonne weärde. Wänn em bedenkt, dat op sonne riisije Bagger maar eene Mönsch sett, es dat doch alles net de bejriipe.
Wail nou so vüel Daaker möt di „Fotovoltaik“ Anlaare volljepokkt send, häbbe vörr dällswiis vüel de vüel Schtroom on wiete net mier woheär domöt. De Sonn lievert os der Schtroom vüel bällijer, wi dä Schtroom ut de Braunkoal.
Nou hüert em onger de Honk, dat am Äng dä jontse Palaver möt di Ömmsiidlong jeschtoppt weärde sall. De RWE säät nikks dodrüever. Jottdonk hätt nou de Schtatt Ärkelänts beschloate, di Ömmsiidlong von di onger Döreper sovort de schtoppe, bös di jontse Saak jekliert es. Hoffentlik haane seij duer.
Wi et nou wörrd, on wenie beij dänne doboave der Verschtonk enjeschalt wörrd, mödde vörr aafwoochte. Möt normale Verschtonk es dat alles net de bejriipe.
Laider es et jo so, dat vörr all dä jontse Kwatsch övver der Schtroompriis betaale. Di jruete Fabrike bruuke ut dä Jronk, wail di uutländische Firme bällijer produtseere könne, net sonn huech Priise vörr der Schtroom de betaale. Betaale mot dat all dä kleene Mönsch.
Nadämm vörr noch änns dur Immeroat möt di Reär ronk jevaare send, jeng et op Heem aan. Vüel waard net jekallt, de Schtimmong woar an der Jronk.
Der 13. Oktober es di Kerek „entwidmet“ woarde. Der Tabernakel es leäch. Övver 600 Lüü on ännije Tiims von et Färnsehen, sojaar een ut Japan on vüel Reporter von de Tsaitonge woare doa. Di Schtimmong konn man en 3 Wöärt dehoop pokke. Wut, Truer on Troane. Nou mödde vörr aafwoochte wea jewönnt, de RWE av de Vernoneft. Op jädde Vool wellt der noije Finantsminister de RWE wier subväntsioneere.
Hermann Böken
Krööchte, der 22. Oktober 2013. Äne Daach wi en der Suemer. 24 Jraad on der jontse Daach Sonneschiin. Et woar waal der wärmste Daach en der Oktober övverhaupt.
